The Anderson Tapes (títol orichinal en anglés, en aragonés As cintas d'Anderson, enguerada en Aragón con o títol de Supergolpe en Manhattan) ye una cinta de cine estausunidense de l'anyo 1971 de cine policiaco dirichida por Sidney Lumet seguntes un guión adaptau por Frank Pierson (basau en The Anderson Tapes, de Lawrence Sanders), con una banda sonora orichinal de Quincy Jones, una dirección de fotografía d'Arthur J. Ornitz y una producción cinematografica de Robert M. Weitman ta la productora cinematografica Robert M. Weitman Productions. Fan parte de l'elenco d'a cinta os actors Sean Connery, Dyan Cannon, Martin Balsam, Ralph Meeker, Alan King, Dick Anthony Williams, Val Avery, Garrett Morris, Stan Gottlieb, Christopher Walken, Conrad Bain, Margaret Hamilton, Anthony Holland, Scott Jacoby, Judith Lowry, Meg Myles, Norman Rose, Max Showalter, Janet Ward, Paul Benjamin y Richard Shull, en os suyos papels principals.
John "Duke" Anderson ye un ladrón que ha cumpliu una condena de 10 anyos en a garchola. Cuan cumple la suya condena recupera la suya relación con su novia Ingrid Everleigh, que mientres a suya estada en a garchola teneba relacions con Werner, qui la alochaba en un bloque de pisos de clase alta en Manhattan. Cuan Anderson beye l'edificio prepara un plan ta robar d'una sola vegada todas as viviendas d'o bloque, cargando tot o botín en una furgoneta. Consigue financiación d'un chicot chefe d'a mafia local y recruta un grupo de cuatre colaboradors ta lo robo, que prepara minuciosament. Tanimientres, lo que Anderson desconoix ye que dende l principio d'a planificación d'o robo se troba baixo la vichilancia d'un equipo d'a policía por as conexions de su novia con un traficant de drogas, baixo la vichilancia d'o Federal Bureau of Investigation por contactos con activistas negros d'un atro d'os suyos colaboradors, y baixo la vichilancia d'a oficina d'impuestos que vichilaba a lo mafioso que financia lo suyo plan. Tanimientres, a falta de conexión entre las tres achencias gubernamentals implicadas y l'intrés propio de cadaguna en as suyas propias arias d'intrés fa que garra d'ellas sía capable d'evitar o robo.
A cinta s'ambienta en a ciudat de Nueva York (Nueva York, Estaus Unius) en a suya epoca actual (1971) y las suyas escenas se filmoron en cuantas localizacions en ixa mesma ciudat.[2]